Azadlığa səsləniş....

Ürəklərimizin dərinliyindən Səni çağırırıq,ey Azadlıq!

Bizi eşit!

Zülmət pərdəsinin arxasından uzadırıq sənə əllərimizi,ey Azadlıq!

Bir bax bizə!

Qar üstündə diz çökürük sənə,ey Azadlıq!

Bizə yazığın gəlsin!

 Sənin möhtəşəm taxtının qarşısında durmuşuq.

Bədənlərimiz əcdadlarımızın qanlı libasları ilə örtülmüşdür.

Başımıza onların qəbirlərinin külü ələnmişdir.

Əlimizdə onların ürəklərini dəlmiş qılıncları tutmuşuq.

Onların bədənlərini deşmiş nizələr,ayaqlarını bağlamış zəncirlər də yanımızdadı.

Biz onların boğazını yırtan qışqırıqla qışqırır,zindanlarda zaman-zaman əks-səda verən məğlubiyyət nəğmələrimizi oxuyur və şikayətlənirik;

Atalarımızın qəlbinin dərinliyindən qopan duaları təkrarlayırıq.

Eşit bizi,ey Azadlıq və dinlə!

Yollarda və evlərdə tapdalanmış gənclik sənə müraciət edir.

Kilsə və məscidlərdə unudulmuş Kitab səni soraqlayır.

Məhkəmə və saraylarda bir tərəfə tullanmış qanun səni çağırır.

Yazığın gəlsin bizə,ey Azadlıq!

Bizi xilas elə!

Bizim dar küçələrimizdə alverçilər öz həyatlarının günlərini satırlar ki,avropadan gələn və bizi soyan insanların xəracını ödəyə bilsinlər.

Və bir kimsə yoxdur onlara məsləhət verə.

Bəhrəsiz torpaqlarda fəllahlar yer şumlayır,ürəklərininin toxumlarını səpir və göz yaşları ilə suvarırlar əkinlərini.

Lakin qaratikandan başqa heç nə bitmir tarlalarında və bir kimsə yoxdur ki,onları doğru yola yönəldə.

Bizim kimsəsiz və bəhrəsiz düzlərimizdə ac-yalavac bədəvilər dolaşır,ayaqları yalın,başı açıq.

Və heç kimin onlara yazığı gəlmir.

De,öz sözünü bizə,ey Azadlıq!

Öyrət bizi!

Əzəldən zülmət yaşamışıq,

bir zindandan o birinə sürüyüblər bizi əsirlər kimi,

zaman da gülüb bizim halımıza.

Bəs səhər nə vaxt açılacaq?

Nə vaxtadək əsrlərin nifrətini daşımalı olacağıq ürəyimizdə?

Bu təhqirlərə haçanadək dözməliyik?

Və nə vaxt ölüm gələcək ki,alsın bizi bu dünyanın əlindən,bəlkə rahatlıq tapaq?

Nə vaxtadək möhtəşəm saraylar ucalda-ucalda miskin komalarda yaşayacağıq?

Nə vaxtadək varlıların anbarını dolduraraq onların süfrəsinin artığı ilə dolanacağıq?

Ey Azadlıq,eşit bizi və öz sözünü tək bir adamın xeyrinə söylə,zira böyük od kiçik qığılcımdan başlayır.

Ey Azadlıq,öz qanadlarının xışıltısı ilə tək bir ürəyi oyat,zira,ildırım tək bir buluddan yaransa da bütün dərələrin dibini və bütün dağların zirvələrini işiqlandırır.

Öz qüdrətinlə bu qara buludları qov,şimşək kimi çax və əcdadlarımızın sümükləri üzərində ucaldılmış bu xanimanları dağıt!

Ya da düşmənlərimizə elə güc bəxş elə ki,bizi birdəfəlik öldürsünlər,

Əbədi sükutda rahatlıq tapaq.

Elşən Novruzlu : https://www.facebook.com/elnovruzlu?ref=tn_tnmn